الكلام دة ما يتسكيتش عليه

الحياة مفروض إن فيها مواقف ..و إن المواقف دى بطريقة أو أخرى كما يقول الكتالوج ليها شكل معين أو تيمة معينة ، لحن بتمشي عليه . الكلام دة للأسف مش هتلاقوة على المدونة دى . كم مرة عدا عليكم موقف و وقفتوا مصدومين أو ميتيتن على روحكم من الضحك و قلتوا لنفسكم : لا الكلام دة ما يتسكتش عليه؟؟؟؟
هنا ..و هنا بس ...
هنقول ..و نضحك..و نعيط..و نتفرج على الكلام اللى ما يتسكتش عليه..

الاثنين، 11 أكتوبر، 2010

الناس فيما يعشقون مذاهب


الناس في ما يعشقون مذاهب ، هل تستطيع ان تجزم ان تلك الحقيقه الرئسيه في الحب لم تكن لتلفت نظرك في كثير من الأحيان، فأنا لا أنكر كفتاة تنتمي إلى مجتمع النميمه النسائي المتواضع أني سمعت تلك الجملة تتكرر إما بالطريقه الأولى ( يخرب بيت كده بتحب فيه إيه مش عارفه ؟؟) أو الثانيه( يدي الحلق للي بلا ودان مش عارفه عاجبوه فيها إيه دي؟؟).

و طبعآ لا نسنتطيع بنظرتنا الفاحصه أن نكتشف تلك الحقيقه المختبئه في طيات سر الحب الخالد و التى لم يستطيع أن يسبر غورها أحدآ حتى الأن، لكني العبده لله المتواضعه جدآ بالأمس كنت أعاني من حاله من حالات الأرق العاطفي المحبب مما جعل عقلي تربه خصبه لزراعة الأفكار الخنفشاريه ،و قررت أن أقوم بتصنيف العشاق على طريقتي الخاصه و رغم أني سأصنفهم بصيغة المذكر لأن معلوماتي الأنثويه و ضميري الحي النابض بالولاء لحزب المرأة اليساري الوطني المعارض الإخواني اللي مش عارف هو عاوز إيه،إلا أنه من الممكن تغيير صيغة المذكر و تحويلها إلى المؤنث في كل ما سوف يرد شرحه و تحليله و تفصيله و فصفصته و قزقزته .

الصنف الأول ( الحبيب الرولار كوستر):

يمتلك كل مقومات السعادة التي تجعلك من النظرة الأول تجلسين أمامه محاطه بهالة من الإنبهار ، مغامر شيق، و شخصيه تمتلك كاريزما عاليه جدآ ، محط إنتباه المحيطين به، يميل في بعض الأوقات للوحده و مجالسة أفكاره التى تتوالد تلقائيآ في عقله و تترك لتنضج على نار هادئه،رومانسي بحنيه، شاعري بتوازن ، مخلص ، غيور بقدر ، يأخذ بيدك و يسافر إلى الأدغال و يغوص في أعماق البحار سيحيطك بالعنايه و الرعايه لكن إن كنت من النوع الذي يتعب و يطمح في إلتقاط الأنفاس فهذا لا يتواجد في جدول أعماله، و إن كسرت قدمك فسيقبلك على جبينك بحنان و يستكمل الرحلة و يعود بعد 15 عام و قد تحول إلى روبنسون كروزو .

الصنف التاني ( الحبيب السناك) :

حبيب لطيف ، خفيف ، ظريف ، يمكن أن تتناوليه بين الوجبات اليوميه دون ان يسبب لكي تلبك معوي أو زياده في الوزن، لا يثقل كاهلك بالأسئله و يعشق الهدوء و السكينه و السلام النفسي، محدود الطلبات و لا يتطلب الحفاظ عليه ميزانيه كبيره ، يرضى بكي دون مكياج أو إضافات و ينظر إلي وجهك المرهق و شعرك المنكوش بسعاده و يقولك إيه الجمال ده؟؟

لكن إن كنتي من عشاق التجديد و التغيير فإنه لن ينتمي لحركة البرادعي و لن يقف خلفك في مظاهره و سيكتفي بإرسال محامي صديق ليكفلك في حال تم القبض عليكى.

الصنف الثالث (الحبيب الراديو ) :

حبيب مسلي من الدرجه الأولي ، يمطرك بوابل من الرسائل و المكالمات الهاتفيه ، يرسل لكي الزهور بمناسبه و غير مناسبه ، يطعمك بيده و يتحدث عنك طوال الوقت ، أقل حركه تبهره و تترك أثر في أعماقه ، حنون بزيادة ، عطوف بزيادة ، كريم بزيادة ، رومانسي بزيادة ، زنان بزيادة ، يميل إلى كثرة الكلام و للأسف فهو رغاي من الدرجة الأولى ، فإن كنت من الأشخاص الذين يعانوا من الصداع النصفي فأنصحك بالإبتعاد عنه قدر الإمكان ، لأن هذا الصنف يتحدث و هو نائم و في أحلامه و لا يكف عن الحديث طوال الوقت .

الصتف الرابع ( حبيب حاجه ساقعه):

حبيب من نوع شتوي أعصابه في ثلاجه قد تستغرق الفترة التي سيبوح لكي بها عن عواطفه و يصرح لكي بحقيقة مشاعره نفس الفتره التي يستغرقها وصول جواب التعيين الخاص بالقوي العامله، قد يكون رومانسي و شاعري و لطيف و كريم أو حساس لكن الضباب الشتوي و الشبوره الصباحيه التى تحيط به طوال العام تمنعكي من رؤيه أي شئ ،

وجوده مسلي في الصيف فهو كالأيس كريم بيطري على القلب، لكن لو كانت شخصيتك عصبيه و دمك حامي فالرجاء الإبتعاد الكلي و التام عن هذا الصنف لإن الحلاوة الطحينية قد إرتفع سعرها و أصبح طابور العيش طويل و ممل مما يمنعنا من أداء واجب الزيارة لكي في السجن (بعد ما دمك غلي و فار و بطحتيه في رأسه).

الصنف الخامس ( الحبيب الوطني "تيمنآ بالحزب الوطني"):

أنه من الصتف الموالي و الموافق، يترك لكي مطلق الحريه في إختيار ما تريدين و يبقى على إنتمائته الحزبيه ، لا يتغير مع مرور الزمن ، تاريخي ، جفرافي، يجلس على كرسي حياتك و يتربع عليه حتى يقضي الأجل و تغادر روحك إلى بارئها لإنه من المؤكد ستموتين قبله، لا يجب أن تغريكي موافقته على كل شئ فهدفه هو الإطاحه بك و الفوز في الإنتخابات و على رأي المثل ( إتمسكن لحد ما إتمكن ) ، مبدأه في الحياة ( القافلة تسير و الكلاب تعوي) و في تلك الحاله أنصحكي بعضه حتي يأخد 21 حقنه و ربنا ولي التوفيق.

الصنف السادس( حبيب مزيكا):

شخصيه فنيه موسيقيه رائعه ، يمتلك كل صفات فتى الشاشه الأول، رائع المظهر و المضمون ،متلمع على سنجة عشره، عيبه الوحيد إنه محاط بهاله من الأضواء و البنات معجبين بيه، و هو طبعآ لإنه متواضع فمش بيحب يكسر بنفس حد فيهم (جاك كسر رقبته)، فإن كنتي من النوع الغيور ، أنصحك بالإبتعاد عنه لإنه لا تنطبق عليه الصفه الرئسيه في البحث عن حبيب (ظل راجل و لا ظل حيطه) فهو للأسف ( اللي متغطي بيه عريان)، و منك لله يا جمال يا مروان عااااااااااا.

قد أكون في نظركم بالغت في الوصف بس ده شئ لزوم الشئ ، و أختم شرحي التفصيلي ، و الرجاء على الراغبين بالحصول على منتجاتنا الإتصال على 9999999

سعر المنتج ثابت...........سعر الشحن ثابت.........و لا يوجد أي ضمنات و البضاعه المباعه لا ترد و لا تستبدل

السبت، 2 أكتوبر، 2010

خرشوف

أقذف بنفسي في بحيرة الغفران ،ألتمس منك العذر و أسترضيك، أخبرك كم هي المرات التي حاولت فيها جاهدة أن أغضبك دون أن أنخلع عن نفسي و تتمزق ساعة ضبط الدقات في بندول روحي ،لا أملك تلك الرفاهيه، رفاهية إغضابك ككل البشر دون أن أهتم أو أحزن ،أشعر عندما أتمرد على نفسي الراضيه بحبك و المستكينه بحنيه بين راحتك أني أصبح كالخرشوف، قاسيه محاطه بأوراق باهتة الخضره كئيبة المنظر و غير محتملة الملمس.
تستجديني الطفله في أعماقي أن أكف عن معاندتها و أخرج علبة الألوان لأرسم على وسادتك قوس قزح و حقل أخضر فاقع و خروف أبيض صغير ،يقفز في أحلامك لينثر السعادة هنا و هناك ،يأخذك في نزهة كرتونيه إلى جدول ماء و تصطادا معآ الكثير من السمك المشوي الجاهز للأكل، تضحك في الحلم و تقع على الأرض ،تخلع حذائك و تركض لتلعب بالماء مع الخروف الصغير الذي يصبح كلب صغير أليف يتبعك كظل و يبشرك بمطر و قمح و جبن و الكثير من الورد.
أطعمك بيدي ،أجلس أمام فرن بلدي قديم و أصنع فطيره مشلتته كبيره ،أغرقها بالعسل و أضعها في فمك، أتأمل سعادتك فأقدر أناملي السحريه التي تبدع ما تحب ، تغزوني أفكار طائشه كلها ورديه ،أتمسك بذراعك و أنا أرتدي جلبيه فلاحي مزركشه كبيض شم النسيم ،أتمشى معك بجوار الترعه و أكتشف أن للريف سحر ،و للحب طعم ريفي لا يدركه الكثير.
أنتظر خروجك من الغرفة و أقفز بشقاوة حرامي محترف خارج للتو من فيلم أكشن ، أتلمس خطك على الورق دون أن أقرأ كلمه فأنا أعلم أنك تبقي الكلمات في رحم عقلك إلى أن تولد طبعة أولى، لكني أعترف أن بيني و بين أحرف الجر في أوراقك علاقه مشبوهه ، و أني على موعد غرامي بكان و أخواتها ،و أن حرف الكاف يفعل بقلبي مفعول القبلة المفاجئه ، و أن علامات الترقيم تقزف بسهامها الطائشه لتصيب روحي دون رحمة أو شفقه، و أن رائحة الورق الفولسكاب كعطر الياسمين يدغدغ الأحلام في مسام عقلي ليوقظها على فهرس و غلاف طبع عليه إسمك بأحرف من نور .

للبعد عنك شوق لازع....
و للقرب منك شهدٌ محبب....

لكلمات الحب البسيطه منك فخامة الملوك و السلاطين و الأباطره...
و لصمتك حضوٌر طاغي و إحترام آسر...

لغضبك حلاوة روح تخنق الأنفاس .....
و لرضاك موسيقى كونيه توقظ ملائكة الطفوله و البراءه و تنير درب عمري.............

الجمعة، 28 مايو، 2010

البرج 13



البرج ال 13
بصتلى من تحت لتحت و كأنى عامله عمله و قالت : يا لئيمه إنت أكيد برج الجوزاء؟؟كلهم أواريب كده .
رديت: يا شيخه و جبتي العبقريه و الفراسه دي كلها منين ده إحنا مبقالناش خمس دقايق متعرفين على بعض؟ و عمومآ ،لا أنا مش برج الجوزاء.
- تبقي أكيد سرطان؟؟
- أعوذ بالله ، حرام عليكي بشرى بعيد عنى .
- طب عقرب؟؟
- يادي اليوم اللي مش هيعدي على خير ، لا يا ستي عذراء إرتحتي( و يا عيني لو طلعت بقى دمها خفيف من إياهم لازم أسمع التعليق الذي يعقب كلمة برج العذراء علشان أشرب الحدوته فوول أوبشن حتى أخر قطره)
- العذراء و الشعر الأبيض هعهعهعههعهععععععههعععععع.
- لا يا ستي أنا من البرج ال13 البرج اللي محدش كتب عنه لسه.(عوض عليه يا رب عوض الصابرين)
نفسي أفهم موضوع الأبراج و هوس الناس الغير منطقي بيها ،عارفه إن الفلك و حركة النجوم و الكواكب علم مش تهيس و مقتنعه إن إخونا العلماء قديمآ طلعت عينهم مذاكره فى الموضوع ده،لكن سامحوني مش قادره أهضم حكاية الأبراج أو أبلعها و لا حتى بشويبس ،ليه واحد يبقى أسد و التاني حمل؟ و مين اللى حدد إن زميلك فى الشغل دايمآ يطلع عقرب و مديرك ثور و إنت يا غلبان تكون جدى؟؟ و هل من المنطق إن مدام سناء مديرة الحسابات تطلع من برج الميزان، فى حيث إن محمد اللى مبيعرفش يعوم و بيغرق فى شبر ميه يكون حوت؟ و تلاقي راجل محترم ملو هدوموه عنده خمس عيال ما شاء الله يرد بفخر، انا من برج العذراء ( لا تعليق) أنا راضيه ذمتكم في الموضوع ده.
حبيت أتعمق و أفهم الموضوع من كل الجوانب مش يمكن أكون ظالمه و مفتريه ، قلت يا بت أكمل الهوم ورك للأخر و أقرا فى الأبراج الصيني لقيت إننا فى نعيم أي و اللهي فى نعيم ، ربنا حب يستر عليّه و طلعت أرنب لكن الأبراج الصيني عليها شوية أسامي حاجه تفرح و تشرح القلب ، الكلب و النمر و التنين و الخروف و الديك و الحصان و الفأر و الأفعى و الخنزير .تخيلوا كده معايا لو رئيس الوزراء فى برنامج خفيف على التلفزيون الصيني و حبيت المذيعه تستظرف و تسأله حضرتك برج إيه؟؟ و طلع من برج الكلب (ده بالصينى )، و لا مثلآ رئيس دوله صديقه طلع من برج القرد و إحتفاء به تم تقديم الموز و الفول السودانى على جميع المدعويين، و لا ممثلة جامدة جدآ و تطلع من برج الأفعى دى مين ممكن يأمن يمثل قدامها بعد كده؟؟ و لو حبيبك فأر ضعي له مصيده، و نصيحه متتجوزيش واحد من برج الديك لإنه هيقلق منامك كل يوم الفجريه، و لو كنت من برج الحصان خلى بالك خيل البلديه لما بتعجز بيعملوا فيها إيه؟؟ و على كل الغلابه المساكين اللى حظهم المنيل طلعهم من برج الخروف نصيحتي ليكم متسيبوش البيت فى عيد الأضحي أحسن العواقب ممكن تكون وخيمه.
بالذمه ده كلام منطقى و لا مقنع حتى؟؟؟
ده على كده طلعت الأبراج اللى عندنا أرحم على الأقل مفيهاش كلب و قرد و خنزيرو فأر،اللطيف إنى أعرف ناس كتير جدآ برغم كل الكلام ده مأخده الموضوع جّد جدآ و لازم علشان تحب حد و تتجوزه يكون برجه يتوافق مع برجها ،و فى ناس لازم تفتح الجرنان على صفحة الأبراج كل يوم قبل ما تنزل الشغل مع إنى أذكر إن فى كاتب كبير مره قال إنهم كانوا بيدوا الأبراج يكتبها اللي خلّص كتابة مقالته و يحط أى حشو هو عاوزه و مع ده فى ناس مصدقه.

أنا بقي قررت أكون من البرج ال13، مع إنى عارفه إن فى ثقافات كتيره يعد رقم 13 رقم نحس لدرجه إن اكتر من 90% من فنادق العالم لا يوجد بها الدور ال13 تلاقي زرار 12 و وراه 14 على طول بس بما إني عنيده و مغامره ، انا بقى هتحدى النحس و هكسره كمان، و هكون البرج ال13 و هعمله برج على مزاجى حاجه كده كوكتيل هنقي الحاجات اللى عجباني فى ال12 برج و أخُدها غصبً و إقتدرا، يعني هكون عنيده فى الحق زى الجدى، و عندي فضول التعّلم و المعرفه زي الدلو، و فى حنية و طيبة الحوت ،و عصبيتي بتنزل على الفاضي زي الحمل، و حلالة عقد زي الثور، و مرحه، و بأكثر من شخصيه زي الجوزاء، و لطيفه زي السرطان ،و عندي عنفوان و كرامه زي الأسد ،و منظمه و عيني ثاقبه زي العذراء ،و صبوره زي الميزان ،و موهوبه زي العقرب، و حساسه و شاعريه زي القوس.
أما إخوانا الصينين فهسيبهم فى حالهم لإن الكلام اللى بيقولوه ميتسكيتش عليه خالص و ربنا يستر...

الخميس، 18 مارس، 2010

أنا جمل


قررت إنى أعتبر النهارده يوم الإعترافات الخطيره و قررت كمان إني أكون واضحه و صريحه مع نفسي و اللى يحصل يحصل، هيسخطوك يا قرد هيعملوك إيه؟؟ منكي متفرقش كتير واحده من اليمين للشمال و التاني من الشمال لليمين.
أنا جمل...أيوه إكتشفت إني جمل من الكبير اللى ليه سنام ده و بيسموه سفينة الصحراء، تخيلوا تناموا بليل تصحوا تاني يوم الصبح منفوخين و السرير واقع فيكم و حاسيين إن شكلكم إتغير و بقي مبعجر و مكلكع تقفوا قدام المرايه تكتشفوا الحقيقه المره...أنا جمل
المنطقي و الطبيعي و المبرر إنك تشيل همّ الناس اللى حواليك و اللى هما جزء لا يتجزء من حياتك و إنك تتعاطف نفسيآ و عاطفيآ و معنويآ و كمان جسديآ (يعنى تتنيل على عينك و تعييّ) لو حد منهم لا قدر الله حصله مكروه أو تعرض لموقف صعب أو تجربه شاقه..و ممكن يكون من الوعي و النضوج و من مبدأ شعور الإنسان مع أخيه الإنسان فى بقاع المعموره، إنك تتعاطف مع المجاعات التى تجتاح الدول الأفريقيه ،و تتألم لألم الفلسطينين و معاناتهم المسمتره و تتغاظ من الشقاق اللى بينخر فيهم زي السوس، وتبقي عاوز تبوس إيدين الناس علشان ينزلوا يعملوا بطاقه إنتخابيه،و تحلم بالتغيير و تهتف للبرادعي لما يتنبح صوتك و تقعد تأخد مضاد حيوي لمدة إسبوع، وتخش فى نقاش جدلي على مباراة مصر و الجزائر و يرتفع ضغطك و ينقلوك المستشفي، و تقلق من تفكير أحمدي نجاد الهستيري، و تفكر فى الأزمة الإقتصادية التى إجتاحات العالم و أفقدت الملايين وظائفهم بما فيهم حضرتك طبعآ و بقيت عاطل و مالكش شغلانه غير اللطم على أسهمك اللى كل يوم و التانى بيتمسح فيها بلاط البورصه الصبح، و إنك تفكر فى أزمة المناخ و المالديف اللى هتغرق كمان 50 سنة و تختفي قبل يا عيني ما تكحل عينيك و تشوفها قبل ما تموت ، و طبيعي كمان تحسد قراصنة الصومال لإنهم بيشتغلوا وظيفة أحلامك (الله يسامحك يا جوني ديب بوظت دماغي)،و تفكر يا تري لو حد رن الجرس فى العراق هو في حد يفتح الباب؟ و لا كلهم راحوا فى التفجيرات الإنتحاريه اللى بنسمع عنها كل يوم لدرجة إنى بقلق عليهم لو عدى يوم من غير ما يطلعلهم حس، كل ده عادي و ممكن يكون طبيعي جدآ،إنما اللى مش عادي و مايتسكيتش عليه خالص خالص....
إني أبقي تمثال من تماثيل الملح ( لمحمد كمال حسن) و أفضل أفكر فى جابر و يصعب عليه عبدالله و سالم و أكره فوزيه و أتغاظ من سلبية الأم ، أو إني أبقي واحده من كراكيب( نهي محمود ) و أحزن معاها و أطبخ معاها و أقعد بالساعات بفكر فيها و يبقي نفسي أكلمها و ننزل نتمشي فى وسط البلد و نقعد على سوق الحميديه و نعمل حفلة شاي لمشمشه الدبدوبه بتاعتها و أعزم دباديبي عليها و نجيب كاميرا و نصورّ نهي فى جنينة الحيوانات و هي راكبه فيل ،أو إني أضحك مع( ألاء عبدالله) و أتحول لضحيه من ضحايا الكول سنتر و أتخض كل ما تليفوني يرن و أبقي عاوزه أحط كل موبايلات الناس على السايلنت ، و من المقلق جدآ و المدمر إني أحس إني بقيت عائشه في يوم غائم فى البر الغربي (لمحمد المنسي قنديل) و أفضل أيام حاسه إنى مطارده و غريبه و ما أعرفش أنام خوفآ من ذئب ممكن يطلع لي من تحت السرير ، و أفقد متعتي فى الحياه لإن حربي في خالتي صفيه و الدير (لبهاء طاهر) عاش مظلوم و مات مظلوم و صفيه أتعاطف معاها لإن العشق حولها لعدوه و مجنونه فى نفس الوقت، و أرجع تاني أقلق على (مصطفي الحسيني و محمد كمال حسن) بعد قهوة المصريين و أقول يا ترى لو قعدوا على قهوة من اللى كتبوا عنهم بعد ما إتنشر الكتاب و طلع إن في حد قراءه و قرر يتخانق معاهم هيحصلهم إيه؟؟ و أبعتلهم رسائل أطمئن بيها عليهم، و أستمتع بإخلاص فلورينتينوا إريثا فى الحب فى زمن الكوليرا (لماركيز) و أقنع نفسي إني هقعد أحب شخص واحد لمدة 60 سنه يالهوي يا طول صبري ربنا يديني الصحه، و أحبس نفسي فى سريري و أعيط بحرقه على شجره فى بيت الياسمين (لإبراهيم عبدالمجيد)، و أفكر فى عريس يشرف و محترم بس يا ترى هجيب نمرة تليفون (غاده عبدالعال) بعد عايزه أتجوز مش يمكن تقول البت دى مجنونه،و يسبني (خالد الخميسي) أيام فى حالة قلق بعد سفينة نوح، و يشلني عاطفيآ (مكاوي سعيد) بتغريدة البجعة لأسابيع طوال، و يحيرني (إبراهيم عبدالمجيد) في كل إسبوع يوم جمعه، و أتحول لحبة هوا (لوليد طاهر) يحدفني مطرح ما هو عايز، و يفضل (طه حسين) هو كل الأيام، و عم (صلاح جاهين) رباعياتي و تميمتي اللى برددها كل يوم قبل ما أنام ،و (أحمد بهجت) ثانيه واحدة من الحب هي زادي فى الحياة....كل دول و أكتر كتير مئات و ملايين بعيش بيهم كل يوم و بيفضلوا معايا مش بينزلوا من على ظهري هما الحملّ اللى بسافر فيه فى صحراء الدنيا ،بيونسوني في الظلمة و بيتكلموا معايا و ينوروا الأيام....إذن
أنا جمل..........................................بس

الأحد، 21 فبراير، 2010

واحد خروف..إتنين خروف ..تلاته خروف


واحد خروف ...إثنين خروف....ثلاثه خروف....
سرير مريح..
ملايات بيضاء...
ظلمه....هدوء...سكينه...حمام دافئ...معده مليانه ...
مقومات السعاده الحقيقه ...
زمان قالوا النوم سلطان, و أنا حاليآ أجزم و على الملأ إن النوم أبو السلاطين كلهم ومش بس سلطان( نو أبسليوتلي)ده إمبراطور من بتوع زمان اللى ما بيتعوضش . عدّت عليه أوقات كتيرة كنت بحس إن النوم ده حلم صعب المنال و إن جسمي الغلبان تم إستنزافه حتى أخر قطره جسمانيآ و فكريآ و ماكنش فاضل غير إنى أجيب حته قطنه أمسح بيها اللى فاضل من الطاقه و أعصرها على دماغي. النهايه الحتميه لتلك الحاله الغير إنسانيه اللى أكيد عدت عليكوا , الجسم بيعمل (شت داون) و بتدخل فى غيبوبه من النوم فى أى مكان و زمان غصبآ عنك, يعنى مثلآ ممكن أنام بهدومى و أنا بزور ناس أو أركن فى السوبر ماركت و أنام واقفه زى الخيل ,مش عاوزه ضحك أنا دلوقتى فايقه و شيفاكم إضحكوا عليه لما أنام.
هضطر أدلل على النظريه بتاعتى فى النوم (سامحني يا خالى) , خالي راجل محترم جدآ و لسنين طويله كان بيشغل منصب مرموق جدآ و لكنه من أنصار نظريه النوم سلطان فى مره من المرات حصل حالة وفاه عند زميل ليه, و بما إنه راجل بيتعامل بالإتيكيت و الدبلوماسيه فكان لازم يروح يعزي حتى لو كان مرهق و يومه كان طويل جدآ.
تأملوا المنظر معايا, العزاء كان فى منزل الزميل ,الكراسي شاغره بعدد كبير من المعزيين, خالى جالس على كرسي بيشرب القهوة, و بعد فتره زمنيه واضح إنها كانت طويله سمع خالى صوت شخير واحد , الصوت كان قوى و وحش, لدرجة إنه لفت نظر خالى اللى إكتشف إن الكراسي فاضيه من المعزيين و الراجل زميله قاعد بيستنه لما يصحى و يروح و بالتالي خالى كان بيسمع صوته شخصيآ. ( المعلومه اللى نسيت أقولهالكم علشان الشفافيه إن خالي خليفة موتزارت و بيتهوفين و باخ يعنى موسيقار عظيم حقيقي و الشخير بتاعه إستثنائي و الأدهى إنى إكتشفت و أنا صغيره إنه كل ليله بينام على صوت الراديو جنبه طول الليل شغال), سامحني يا خال, بس ده لا يمنع إنه لولا حنجرته الذهبيه و لحميته العبقريه ماكنش سمع الموسيقي الجنائزيه اللى عملها فى العزاء.
نيجي بقي للأعترافات الشخصيه, فى طفولتى كنت مشهوره إنى لازم أقفل 12 ساعه نوم فى اليوم و إلا أتشائم . المحزن إنهم فضلوا يقروا عليا لحد ما بقيت فى عرض 6 ساعات على بعض شوفتوا التدهور اللى وصلتلوه؟؟
كل اللى قلتهلكم كان مقدمات المشكله الحقيقيه لما تبقي مرهق و مسِتوى على رأي أمي , و كل ظروف الجريمه الكامله قصدى النوم مواتيه و فجأه يجيلك قلق سخيف رزل ينغص عليك عيشتك ، تحاول كل المحاولات الممكنه لهدهدة دماغك, أبدآ تقلش حجر صوان، يا حبيبتى الله يهديكي, لا , يا ماما ننا هو , لا , طب الله يرضى عليكي و يكرمك , لا , بت إتخمدى لأقوم أخمدك, لا , سد يا روحى سد , لا, طب نتناقش زى الناس العاقله مش عاوزه تنامى ليه؟ غلاسه , رخامه, تباته عند جناب أهلك مانع. يبقى ردك على نفسك حسبي الله و نعم الوكيل عاااااااااااااااااااااااااااا.
هنا بقى نلجأ للتحايل و نجيب كل اللى إتعلمناه و درسناه بدايه من دُش دافى و وجبه محترمه مرورآ بكوب لبن و زيت اللافندر على المخده و كباية أعشاب و ممكن الموضوع يتطور لجلسة مساج و تحاول تقرأ كتاب و تسمع مزيكه هاديه , و فى حالات أخر يلجأ البعض لدواء الحساسيه أو منوم و أنا منصحكمش تعملوا ده.
بما إنكم غاليين عليه، و أنا مش ممكن أخبي عنكم سر ، هقلكم الطريقه السحريه اللى ممكن تنفع فى كل وقت و أى يوم إلا أيام عيد الأضحي و هتعرفوا دلوقتى ليه. كتير لما كنا أطفال و النوم كان بيبقي صعب كانوا يقولولنا عدوا من 1 لعشره و دكاترة التخدير عارفين النقطه دى كويس اللى إنتوا مش عارفينه إنكم لازم تعدوا كده ..
واحد خروف
إتنين خروف
تلاته خروف
أربعه خروف
و فى كل مره الخروف مفروض ينط من عند ودانك اليمين فوق دماغك لحد ودانك الشمال و فى خمسه خروف تحديدآ غمض عينيك لإنه خروف بيبي و ممكن رجله القصيره تخليه يوقع فوقك ( من غير ضحك شيفاكم) إلخ بقى لحد ما تناموا, اللى هتلاحظوه إن كل يوم الخرفان هتقل متخافوش محدش بيسرق القطيع بس إنتوا اللى بقيتوا بتناموا أسرع . أوه ه ه ه ه ه سلام بقي لإن بتاوب من عد الخرفان و الكلام ده لازم الواحد يسكت و ينام بعديه.

الأربعاء، 6 يناير، 2010

النظريه النسائيه ( اللهم إحفظنا)


واضح إن الأزمه النسائيه الأزليه واحده منذ القَدم و غير قابله للتغير أو التعديل مهما حصل و إختلفت الطبائع أو الثقافات أو المستوى الإجتماعى ، الست هى الست على مر العصور و التاريخ، (و مع الإعتذار لصنف الحريم اللى أنتمى إليهم بفخر،هى هى بغباوة دماغهم و عَندهم اللى بيعميهم عن التفكير الموضوعي و المنطقي تمامآ).
أيام رجل الكهف و العصر الحجري، كانت الست ممكن تبطح جوزها و تفتحله دماغه لو كلم الست اللى ساكنه فى الكهف اللى جنبهم ، أو حتى حاول يبصلها، مع العلم إن أقرب كهف كان على مسافة 15 كيلومتر، بس مش يمكن يكون جوزها زرقاء اليمامه أهو ميضرش تفقعله عين و تخليله واحده لو حب يستعملها إستعمال مشروع و غير محرم .
بعد كده، حصل التطور الطبيعي للحاجه الساقعه و برضه فضلت تعمل نفس العمله، حتى الستات اللى حكموا بلاد ، و داروا فى شؤون العباد فضلوا حافظين نفس الدرس ،من أول شجرة الدر و كيلوبترا و حتشبسوت اللى عملت فيها راجل و ريا و سكينه و لغاية هيلارى كلينتون.
النظرية فضلت واحده، الشك ، الغيره ، تدعبسي وراه لحد ما يقع ، و الإنتقام العظيم و هو و حظه بقى ، هاااااااااااا الله يسهل عليه كان إبن ناس و خدوم و اللهى ليه وحشه. إوعوا تكونوا فهمتونى غلط، إحنا مش قتالين قتله (صحيح فى مجموعة ستات كدة بس دول أقليه يا جماعه) إنما ممكن يموت بفعل التقادم أو السن أو كمدآ أو سكته قلبيه أو ذبحه صدريه أو عوامل التعريه (نايم مثلآ بقاله سنه فى البلكونه) يعنى كلها موتة ربنا إحنا مالناش يد فيها (يا رب سامحنى على الكذب دى موته مدبره و بفعل فاعل كمان) .
طبعآ مستغربين أنا بقلكم الكلام ده كله ليه ؟؟؟ جيالكم فى الحوار..
راجل غلبان بيشتغل سواق عند واحده صاحبتي متجوز و عنده 3 عيال، يعنى وضعه على قده جدآ و يا دوبك . صحيح طول عمرها صاحبتي بتشتكى من ذكائه المفرط ( كلها خلقة ربنا عيببببب) و عبقريته الفذه ( قولنا عيبببببببب) بس أهو راجل محترم و على رأي أبويه مهو لو عبقري كان إشتغل دكتور و لا الحوجه ليكم و لخدمتكم.
الراجل ده شوفتوه إمبارح و شكله كان مش عاجبنى مهموم كده و مش مركز صحيح عدم التركيز ده العادى بتاعه بس زياده حبيتين و بما إنه فاكرنى عبقرية زمانى و بيستشرنى فى كل حاجه دى على أساس إنى دكتوره و مهندسه و صيدلانيه و عالمة ذره و مدرسه و ميكانيكيه و كل حاجه، بكل براءه سألته مالك؟؟؟ و إليكم النظريه النسائيه كما قال الكتالوج.
أصلي عندى مشكله فى البيت مع العيال (و تعنى المدام و ده لإنه يمني).
خير إن شاء الله خير.
لا و اللهى أصل الإسبوع اللى فات كنا معزومين على فرح ، و كانت عاوزانى أشترلها هدوم جديده و بعد ما نزلنا السوق و إديتها كل اللى فى جيبي ، إشترت اللى هى عاوزاه و إحنا رايحيين الفرح كلمتنى بنت عمى اللى هى أختى فى الرضاعه ، متجوزه و عندها بنت و طلبت منى أعدى أخدهم معانا على الفرح علشان جوزها مسافر ، و حصلت مصيبه و بدأ المحضر (إفتح يا إبنى الكراسه و سجل إنه فى ساعته و تاريخه) ، س : مين اللى كلمتك؟؟ ج : بنت عمى و إختى فى الرضاعه.
س : كانت عاوزه إيه؟؟ ج : نعدى ناخدهم معانا علشان جوزها مسافر.
س : طيب و تتكلم معاك ليه؟؟ و علشان إيه ؟؟ و من إمتى ؟؟ و إزاى؟؟ و فين ؟؟ و ليه؟؟؟ و بتخبي عليه ليه؟؟ و قالتلك إيه ؟؟ إنطق ؟؟ قول ؟؟ إتكلم؟؟؟ ما تكذيش؟؟ شكلك هتكذب ؟؟؟ شوفت ؟؟؟؟؟؟؟؟؟؟؟؟؟؟؟؟؟؟
ج : لا حول و لا قوة إلا بالله ، إستهدى بالله بقولك أختى فى الرضاعه.
بعد تفكير و حسابات سريعه قررت مراته تلتزم الصمت فى هدنه مؤقته لمده زمنيه محدده هى المده الزمنيه لإنتهاء الفرح أصلها مش هتضيع على نفسها الهدوم و المكياج و الهلمه دى، و حسابه بعدين لما تروح البيت. روحت البيت، و بدأت الخناقه اللى عادة بتكون من طرف واحد بس، لإن الراجل بيبقي يا عيني مخضوض و قاعد فى ركن منكمش على ذاته بيتفرج على فيلم الرعب اللى حاصل قدامه،و النهاية الطبيعيه أنا سيبالك البيت و العيال و ماشيه، يا سيتي يهديكي، لا ، يرضيكي، لا ، طيب علشان خاطرى , لا ، العيال , لا ، جواب نهائي و ناديلى جورج قرداحي يروحنى قصدى حد من أهلى.
روحت و طبعآ هو يا عينى لاص بالعيال التلاته و بعد محاولات و مداولات و مناقشات و شويه تانية هيطلع أمه و مراة عمه من التربه يحلفولها إنهم إخوات فى الرضاعه، تنازلت و تعطفت و تكرمت و وافقت ترجع بشروط .
أولآ، مفيش حاجه إسمها بنت عمك. ثانيآ، مفيش موبايل يلا بقي بالمره. ثالثآ ، قبل ما أخرج من بيت أبويه و أمى تدبح تحت رجلى أربع خرفان (حسبي الله و نعم الوكيل فيكي يا شيخه فاكره نفسك عبله و لا ولادة بنت المستكفي و بتنتقم من إبن زيدون ده كده ذبحتيه هوه و العيال و الخرفان راحوا فى الرجلين ، شوفتوا الدماغ الحريمي اللى جايبنه ورا).
إديناه الفلوس و من الغيظ كنت هقوله يدبحها هيه بدل الأربع خرفان اللى ماتوا هدر علشان غباوة و غيرة أنثي..أنا راضيه ذمتكم و ضميركم سواء كنتوا رجاله أو ستات بالذمه الكلام ده يتسكيت عليه؟؟؟؟؟؟؟؟؟؟؟؟؟؟
ملحوظة: يا بنات متزعلوش منى أنا نفسي أحيانآ بتجيلى حالات الغباء المستعصيه دى، و علشان كده هديكم العلاج بتاعها أول ما تحسي الدم بيغلى فى عروقك، إستعيذى بالله من الشيطان الرجيم و إبعدى عن أى أدوات حاده و خدي بق مايه معدنيه و متجيش جنب الموبايل أحسن ترتكبي حماقه تندمى عليها و ربنا يسترها معانا.

الثلاثاء، 5 يناير، 2010

العقيد المغربي


العقيد المغربي..
تفتكروا الإنسان ممكن يبقي نصاب إزاى؟؟سؤال جديد صح؟؟ عمومآ أنا عندى نظرية فى الموضوع ده . الإنسان بيتولد عنده بذرة النصب كلنا كده و هقولكم إزاى.
فاكرين لما كنا صغيرين و كنا بنعمل عيانيين علشان منروحش المدرسة؟ أو لما كنا بنجرى نشتكى من طفل أو حد ضربنا و نعيط بحرقة مع العلم إننا إحنا اللى بنكون رنيناه علقه و مقطعينه؟؟ فاكرين لما كنا بنأخد اللعب من بعد؟؟ و نضحك على بعض و نأكل الشوكولاتة و البونبونى من ورا بعض؟؟ ده فى نظرى نصب..
يبقى كل واحد فينا بيتولد جواه بذرة نصاب يا إما ينميها و يكبرها و يبقى نصاب محترف أو يتحجج إن الظروف هى اللى خلته نصاب يا إما يحجمها و يخليها مجرد مقالب طفوليه بتنئح على الواحد كل فتره و التانيه.يعنى على رأى سعيد صالح (يا بنتى أنا عندى إستعداد للإنحراف بس مش لآقى اللى يوجهنى) إذن الموضوع هو عملية توجيه صحن الدش قصدى صحن الغش و النصب لا أكثر و لا أقل.
الحكاية مش بس كده حتى أساليب و طرق النصب تطورت بتطور العصر و التكنولوجيا، زمان كان النصاب بيبقى مجرد شحات باين عليه غلبان و هو فى الحقيقة متسول بيشتغل ضمن جماعات منظمة دلوقتى عمليات النصب يقت مبتكره و على كبير و بدون الخوض فى التفاصيل علشان متزهقوش منى و تناموا و تقولوا عنى جاى أنصب عليكم هحكلكم حدوتة العقيد المغربي و النقيب أحمد.
أولآ هعرفكم على عبدالله شخصية لطيفة لشاب صغير فى مقتبل حياته كده حاجه تفرح ما شاء الله عليه. إنسان متدين بإتزان و متعلم و صديق للبيئه يعنى بيستعمل العجله كوسيلة مواصلات (و حكاية البيئه دى فى مصر عجبانى خالص إحنا عاوزين 80مليون زى عبدالله على ما يبنلنا بيئه)، المهم فى يوم كان فى الشارع و فوجئ براجل محترم لابس بدله شيك إبتدى يحكيله حدوتة إبنى العيان فى المستشفى و حالة صعبه و محتاج فلوس و لإن الكريدتكارد (البطاقة الإتمانية) مكسوره و ورهاله طبعآ الراجل صادق فهو مش قادر يسحب يبها فلوس .عبدالله بكل شهامه خرج الفلوس اللى فى جيبه و إداها للراجل اللى وعده إنه هيكلموا فى التليفون و يردهمله فى أقرب فرصه. عرفتوا طبعآ الراجل لا كلمه و لا أى حاجه من ده حصلت.
بعد كام شهر فوجئ عبدالله بالراجل بيمارس نفس النصبه على صديق تانى فى الشارع حاول يتصرف بس معرفش غير إنه ينقذ صاحبه قبل ما يقع فى نفس الفخ. لحد ما فى يوم أراد ربنا يحصل الفيلم التالى:
عبدالله و مجموعه من صحابه خارجين من المسجد و لاقوا الراجل فى الشارع و طبعآ كان عبدالله فاضح الراجا فضيحة ماردونا فى كاس العالم يعنى كلهم إلى حد ما عندهم فكره عن الحدوته.إتلموا على الراجل و فجأة عبدالله شاور على واحد من الشباب و قال: هو دة الراجل النصاب يا فندم هو ده يا نقيب أحمد، و هنا تدخل النقيب أحمد اللى لا كان أحمد و لا كان نقيب و بدأ فى إستجواب الرجل اللى كل ما يحاول يشرح أو يتكلم يزعق فيه سيادة النقيب و يقولوه نزل إيديك. الراجل وضعه بقى مأساة حقيقه و حالته تصعب على الكافر و كل شويه يقولوه النقيب أحمد عارف لو أخدتك القسم صحابي هيعملولى فيك أحلى واجب و الكارثة إن الواجب هيتعمل فى النقيب نفسه اللى إنتحل شخصية ضابط شرطة و هو حتى و لا ضابط إيقاع و لا ضابط نفسه.
إبتدى الراجل يتوتر و هيعيط لدرجة إنه صعب على الكل بما فيهم عبدالله بس رفضة يخرج البطاقة خلاهم مصريين يستمروا فى التمثلية و كلموا واحد صاحبيهم إسمة المغربي كان حلم حياته يبقي ضابط بس الحلم تكسر على صخرة الواقع المرير، طلبوا المغربي اللى كان نايم بيحلم فى السرير بشاكيرا و بدون أى شرح إدوا الراجل التليفون و قالوله كلم العقيد المغربي.
الراجل إنهار و العقيد طبعآ فرصة و جت لحد عنده و قعد يقوله: أنا نايم فى السرير عارف لو وقفت بس ممكن أعمل فيك إيه؟؟؟؟؟؟؟؟؟؟؟(بالزمه ده تهديد عقيد ده تهديد عفريت ) الراجل خرج البطاقة و كل الفلوس اللى فى جيبه اللى ماكفتش التمن اللى نصب بيه على عبدالله . العيال الراجل صعب عليهم و قرروا يدلوا تمن المواصلات و كمان يدوروله على شغل علشان يبطل ينصب على الناس. شوقتوا خيبه أكتر من كده.
الشباب إضطروا ينصبوا على النصاب علشان يجيبوا حق صاحبهم , يعنى الواحد يضطر يعمل نفس الغلطه علشان يرجع حقه بالزمة الكلام ده يتسكيت عليه؟؟؟

السبت، 2 يناير، 2010

ألبوم صور


لما فكرت أعمل مدونة و أسميها الكلام ده ما يتسكيتش عليه، كان قصدى إن فى كلام ممكن مايعديش فى حياتنا بدون ما يترك علامه و يحفر أثر نشيله فى ذاكرتنا و قلوبنا سنين طويله و نفضل نحكيه لأى حد جديد بنتعرف عليه.
كلام ممكن يكون بيعرفنا شخصيتنا الحقيقية كلام حلو له طعم السكر و أحيانآ مر علقم و ممكن يكون كلام ملحة زيادة أو دلع و ناقص ملح و ملوش طعم ،الكلام دة كلام ما يتسكيتش عليه.
عدت عليَه فى حياتي أوقات كان نفسي أملك إختراع يخزن الكلمات يجمدها فى ودانى كأنى بأخدلها صورة فتوغرافية . أحفظ الصوت و اللحظة اللى بعيشها و إحساسي بالكلام ده. ممكن تقولولى نصورها فيديو،بس دة مش منطقي . مين فينا ماسك كاميرة فيديو لكل لحظه و ثانيه فى حياته؟ الحل الوحيد إنك تجرى تكتب الكلام و التاريخ فى ورقة . تعلق عليه، و تخزن إحساسك كتابة ، سعيتها كل مرة هتقرا كلامك هتحسه و يمكن تضحك أو تدمع و ممكن تقول إية العبط دة؟ أنا بحاول أعمل معاكم و بيكم ده و علشان إنتوا غاليين عليه، هعلمكم طريقتى فى تخزين الكلام و هندخل سوا ألبوم صور ، ألبوم، صوره كلمات و حروف و لحظات و مشاعر و أحاسيس.
الصوره الأولى: طفله صغيره لابسه هدوم العيد ، فرحانه و متحمسه و هتموت تخرج تعييد على جدتها. صاحب بابها اللطيف جيه الصبحيه و أكل الكحك و عَيد و شرب القهوة و برضه، مفيش فايده .البنت يتجرى على الراجل بعد ما سهت مامتها بتمسك إيده و تقوله: عمى جمال تتن عفون (يعنى شكرآ و عفوآ و أنستنا و شرفتنا و مع السلامة) هاااااااااااه الله يسهل عليك يا عمو جمال و اللهى كنت راجل لطيف و ده نهاية عهدنا بيك.
الصورة التانية: بنت صغيرة برضوه بتجرى على السلم نازلة تشوف أختها الصغيرة اللى وقعت أربع تدوار كاملة و هى راكبه المشايه و بعد ما مامتها أغمى عليها ،الطفله اللى عمرها 3 سنين طالعه شايله أختها السليمة و بتقول: ما ماتتش يا ماما لسه عايشه ما ماتتش.
الصورة الثالثة:بنت عمرها 12 سنة طلب منها تعمل أم لأخوها اللى عمره 5 سنين ، فقررت إنها تألف غنوة تغنيهاله علشان يسكت و ما يعيطش: حمودة يا شاطر، يا رايح على القناطر، تشترى تفاحة ، و تقول للفلاحة ، أنا راجع على بيتى .
الصورة الرابعة: طفل قاعد فى البيت مع أخوة اللى مش باين من الأرض ، و مطالب يعمل أب و أم و أخ لمدة 7 ساعات يوميآ يا ترى عمل إيه؟؟ وقف عند الشباك و فضل يشاورله على كل حاجه و يقوله: إية ده؟؟؟؟؟؟؟ و الدهشة و الحب و الذكريات جمعت بين الأخين .
الصورة الخامسة: أب بيشيل العقاب عن بنته و يقولها: علشان أبوكى ترضي تخزلينى و تكسفينى ،علشان خاطرى أنا ،ذاكرى و إنجحي.
الصورة السادسة: بنت ،كبرت شوية ،بيتقلها إنتى حسن صبى. تبص فى المراية متشوفش غير ملامح بنت .بنت مش بطالة كمان.
الصورة السابعة: مدرسة بتقول لتلميذة شكلك بيعصبنى.كسرت جواها الثقة.
الصورة الثامنة:أستاذ فيزياء،غير مريح .بيغير مصير الأحلام و يخليها كوابيس. باي باي علمي، و ماله الأدبي؟
الصورة التاسعة:سنرجع يومآ إلى حينا و نغرق فى خافقات المني،سنرجع مهما يمر الزمان و تنئا المسافات ما بيننا. إحساس بالوطن المفقود.
الصورة العاشرة:أب فرحان بنجاح إبنه،أنا رقصت النهارده.ست معرفهاش و حضن و أجمل كلمة،أنا فخورة بيكي.شكرآ على الهدايا السماوية دى.
الصورة الحادى عشر: تسلم إيديكي يا بنتى.إية؟؟ تصدق يا عم أنا عمرى ما حد قالى تسلم إيديك.و تجمعنا قعده على الرصيف.
الصورة الثانية عشر:إنتى أجمل بنت شوفتها فى حياتى.و أقربهم لقلبي.لا و علشان تكمل بقى,كلما تضحكين يزيد عمرى عامآ.أنا كده زاد عمرى قرن يا فندم.
الصورة الثالثة عشر:بودى...روعة الطفولة و برائتها تتجسد فى سنجاب صغير.إية ده؟؟؟؟أكل؟؟؟؟؟؟؟ يا ربي خد من عمرى على عمره.
الصورة الرابعه عشر: إنتى اللى ليه و الحتة الجوانيه. دودو و نظرة حنان،ربي يسعدلك قلبك.
الصورة الخامسة عشر: فكى الطرحه علشان أشوف شعرك الحلو.تبصله و هو مش باين من الأرض .تفك الطرحة يحضنها ببراءته و يقولها، تحفة بس متقوليش لحد.
الصورة السادسة عشر: هى مصر عملت إية مع الجزائر؟ محدش يرد عليه،مش عدم إهتمام لا و اللهى بس 4 سنين هيفهم إزاى؟ يجرى و ملامحه كلها جدية.أنا عرفت الحقيقة بس عاوز أقلكم حاجة، مصر مش ممكن تخسر أبدآ.
الصورة السابعة عشر:إنت تؤام روحى. رسالة فى الإنبوكس.
الصورة الثامنة عشر: بصلي عينيك فى عيني.ههههههههه مستحيل نعرف نكذب.
الصورة التاسعة عشر: هنا فى مخ مش تبتب(إسمة شبشب).
الصورة العشرين:أسفة ،الإعتذار قمة الرقي و الجمال .
الصورة الواحدة و العشرين: الله يرضي عليكي مطرح ما وجهك مندار. أجمل دعوة سمعتها فى حياتي.
الصورة الثانية و العشرين:أنا اللى كتبت الكتاب ده . كأنها جمله من تلحين القصبجي حاجة كده زى رق الحبيب.
دول شوية صور و كلام ما يتسكيتش عليهم ، فيهم الحلو و فيهم الرائع و فيهم المؤلم دونوا لحظاتكم ، عيشوها مرة و إتنين و مليون..الكلام الجميل و حتى المؤلم حرام إنه يتسكيت عليه...ده كلام ما يتسكيتش عليه...